Dili, 27 Junu 2024 – Komisaun Nasional Desportu (KND), servisu hamutuk ho Confederação do Desporto de Timor-Leste (CDTL), organiza formasaun ba Anti-Doping Education & Learning (ADEL) ba atleta sira iha nivel internasionál Timor-Leste nian. Inisiativa ida-ne’e, ne’ebé hala’o iha loron 27 fulan-Juñu, ho alvu atleta elite sira, inklui sira ne’ebé sei reprezenta Timor-Leste iha Jogu Olimpiku no Paralimpiku 2024 iha Paris, Fransa.
Programa ne’e ninia objetivu mak atu prepara atleta sira ho koñesimentu no komprensaun esensiál kona-ba regulamentu anti-doping, hodi asegura katak sira adere ba padraun internasionál sira. Aleinde ne’e, atleta sira hetan mos guia atu hetan sertifikadu Anti-Doping Education & Learning (ADEL), ne’ebe sai nu’udar rekizitu obrigatóriu ida atu kompete iha eventu internasionál sira. Sertifikasaun ADEL asegura katak atleta sira hetan informasaun kompletu kona-ba regra anti-doping no bele kompete ho integridade.
Sesaun edukasaun ida-ne’e hanesan parte ida husi planu edukasaun anti-doping Timor-Leste nian atu suporta no prepara nia atleta sira ba senariu globál, hodi asegura katak sira kompete ho justu no onra.
